Deputetët e opozitës braktisën seancën plenare të Kuvendit pas fjalës që mbajti zv.kryeministrja dhe ministrja e Infrastrukturës dhe Energjisë, Belinda Balluku, në lidhje me hetimin që po zhvillohet ndaj saj nga SPAK për çështën e tenderit të tunelit të Llogarasë.
Në fillim të fjalës së saj, Balluku ka theksuar se nuk do të prononcohet për çështjen nën hetim, duke shtuar se do të presë deri në përfundimin e hetimeve dhe të vendimit të drejtësisë, për të bërë çdo koment. “Derisa e vërteta të marrë forma të prerë, cilado të jetë ajo”, tha Balluku, duke u shprehur se nuk do të spekullojë për hetimin derisa të ketë një vendim të qartë.
Reagimi i opozitës, që braktisi sallën pas fjalës së saj, tregon tensionet e vazhdueshme politike, pasi opozita ka shprehur kritika ndaj qeverisë dhe veprimeve të saj, veçanërisht në lidhje me çështjet që përfshijnë projekte të mëdha infrastrukturore, si ai i tunelit të Llogarasë.