Policia ka dhënë versionin zyrtar të ngjarjes së rëndë që ndodhi pasditen e sotme në qytetin e Elbasanit, ku një person është ekzekutuar nga disa persona me një makinë.
Në Elbasan, në vendin e quajtur “Rrethrrotullimi i luleve”, siç duket dhe nga pamjet e siguruara nga Gazeta “Shqip”, në rrethana ende të paqarta është vrarë me armë zjarri shtetasi E.R, rreth 39 vjeç.
Autorët dyshohet se janë larguar me shpejtësi në drejtim të aksit rrugor Bradashesh-Paper. Në një ullishte i kanë vënë zjarrin mjetit dhe janë larguar në kodrat përballë Paprit.
Shërbimet e Policsë janë vënë në ndjeke të autorëve dhe po bëhet rrethimi i zonës ku dyshohet se mund të jenë larguar autorët. Janë ngritur menjëherë pika kontrolli në aksin rrugor Elbasan-Rrogozhinë, Elbasan-Tiranë e Elbasan-Belsh.
Në ndihmë të Policisë lokale janë nisur FNSH dhe Renea, si dhe një grup specialistët të Departamentit të Policisë Kriminale në DPPSH.
Grupi hetimor ndodhet në vendngjarje dhe pu punon për fiksimin e çdo prove të mundshme që do çojë në zbardhjen e ngjarjes, identifikimin dhe kapjen e autorëve të ngjarjes.
Nën drejtimin e Prokurorisë vijon puna për zbardhjen e plotë të rrethanave të ngjarjes.
