Policia ka arritur të arrestojë autorin e vjedhjes së një marketi, ngjarje e ndodhur mesditën e djeshme në Durrës. Mësohet se në pranga ka rënë një 26-vjeçar, i cili edhe më herët është ndaluar për ngjarje të ngjashme. Ditën e djeshme, ai hyri në një market në lagjen 17 të qytetit bregdetar, shtyu kasieren dhe mori paratë nga kasa.
Njoftimi i policisë:
Kapet dhe vihet në pranga 26-vjeçari që vodhi dje, një shumë parash në kasën e një marketi në Durrës.
Rezulton që 26-vjeçari, është me precedent penal për vjedhje.
Specialistët për Hetimin e Krimeve të Komisariatit të Policisë Durrës arrestuan shtetasin F. S., 26 vjeç, banues në Durrës, pasi nga hetimet dyshohet se më datë 24.08.2026, rreth orës 15:00, ka vjedhur një shumë parash në kasën e një marketi në lagjen nr. 17, Durrës.
Ky shtetas u identifikua menjëherë pas vjedhjes dhe u kap nga shërbimet e Forcës së Posaçme “Shqiponja”, disa orë pas krimit.
Materialet procedurale iu referuan Prokurorisë së Durrësit, për veprime të mëtejshme, për veprën penale “Vjedhja”.