Tre punonjës të Bashkisë së Vlorës janë pezulluar nga detyra, pas dyshimeve se kanë abuzuar me mjetet e punës për të vjedhur karburant në Pikën e Grumbullimit të Mbetjeve. Ngjarja ka ndodhur më 19 dhjetor 2025, kur punonjësi i Policisë Bashkiake, I.Dh., ka informuar Përgjegjësin e Sektorit, E.V., për shenja të dyshimta që tregonin se nga një kamion i ushtrisë, që ishte parkuar në territorin e Pikës së Grumbullimit të Mbetjeve, mund të ishte marrë karburant.
Pasi morën informacionin, Përgjegjësi i Sektorit, së bashku me efektivin P.M., shkuan në vendngjarje dhe, duke verifikuar pamjet e kamerave të sigurisë, u vërtetua se kamera që mbulonte zonën e parkimit të kamionëve ishte zhvendosur qëllimisht. Një situatë e ngjashme u konstatuan edhe gjatë një periudhe tjetër.
Pas verifikimeve, u identifikua se punonjësit e ndërmarrjes së pastrimit, A.B. dhe B.H., kishin kërkuar zhvendosjen e kamerave për t’u mundësuar që të furnizoheshin me karburant nga mjeti i ushtrisë. Ky akt ka çuar në nisjen e procedimeve disiplinore.
Pas këtyre zhvillimeve, është nisur një procedim disiplinor ndaj efektivit të Policisë Bashkiake, M.J., për shkelje gjatë kryerjes së detyrës, pasi ai ka lejuar zhvendosjen e kamerave dhe ka ndihmuar në realizimin e veprës penale.
Hetimet janë ende në vazhdim për të zbardhur tërësisht ngjarjen dhe për të identifikuar çdo person tjetër që mund të jetë i përfshirë. Ndërkohë, punonjësit e pezulluar kanë kërkuar të rikthehen në punë, megjithëse ata janë ndalur nga detyra për të pritur përfundimin e hetimeve të brendshme.
Ky incident ka ngritur shqetësime për menaxhimin e resurseve dhe sigurinë në administratën publike, duke kërkuar masat e nevojshme për përmirësimin e kontrollit të përdorimit të mjeteve dhe karburantit.