Pas ngjarjes së rëndë të ndodhur në provincën e Pizës, ku një i ri shqiptar u vra me armë zjarri, mediat italiane kanë publikuar identitetin dhe foton e viktimës, duke hedhur më shumë dritë mbi rrethanat e ngjarjes dhe jetën e tij në Itali.
Viktima është 25-vjeçari Kevin Muharremi, i cili u qëllua për vdekje në Montecalvoli di Santa Maria a Monte. I riu, që punonte në një lavazh makinash në Fucecchio, u sulmua rreth orës 05:00 të mëngjesit në zonën e Via della Repubblica, teksa po kthehej në shtëpi.
Sipas rindërtimit të ngjarjes, pak më herët ai kishte qenë në një lokal nate në zonën e Valderës, ku dyshohet se kishte ndodhur një përplasje me disa persona. Hetuesit besojnë se konflikti mund të ketë çuar në sulmin e mëvonshëm, kur persona të armatosur iu afruan automjetit ku ndodhej si pasagjer dhe hapën zjarr, duke e lënë të riun pa jetë në vendngjarje, përpara syve të të afërmve që ndodheshin me të.
Banorët e zonës tregojnë se u zgjuan nga të shtënat dhe britmat e dëshpëruara që thërrisnin emrin e viktimës, një detaj që e bën ngjarjen edhe më tronditëse. Ndërkohë, policia italiane po vijon hetimet për të identifikuar autorët dhe për të sqaruar motivin e sulmit, duke mos përjashtuar mundësinë që viktima dhe agresorët të njiheshin mes tyre.
Publikimi i fotos së Kevin Muharremit ka sjellë reagime të shumta në komunitetin shqiptar në Itali, ku miqtë dhe të njohurit e përshkruajnë si një djalë punëtor dhe të qetë, ndërsa kërkojnë drejtësi për vrasjen e tij.