Sot në Gjykatën e Apelit zhvillohet seanca për shqyrtimin e kërkesës së Gjon Shkambit dhe Banush Koxhajt për zbutjen e masës së sigurisë. Gjon Shkambi, xhaxhai i Elvis Shkambit, autori i vrasjes së gjyqtarit Astrit Kalaja, është akuzuar se kishte dijeni për planin e nipit të tij për të kryer krimin. Ngjarja tronditëse ndodhi në Gjykatën e Apelit, ku Elvis Shkambi vrau gjyqtarin Kalaja.
Ndërsa Banush Koxhaj, punonjës sigurie në gjykatë, akuzohet për shpërdorim detyre, pasi nuk reagoi kur detektori i metalëve sinjalizoi praninë e armës që shpërtheu gjatë ngjarjes. Hetimet kanë nxjerrë dyshime mbi veprimet e të dyshuarve në momentin e ngjarjes.
Seanca pritet të vendosë për mundësinë e zbutjes së masës së sigurisë ndaj të dyshuarve, të cilët aktualisht ndodhen në paraburgim.