Hetimet për vrasjen e dyfishtë në Finikounta – ku u ekzekutuan pronari 68-vjeçar i një kampingu dhe punëtori shqiptar – po zgjerojnë rrethin e të dyshuarve. Dy gra dhe një 30-vjeçar, për të cilin autoritetet greke kanë lëshuar tashmë urdhër arresti, janë në fokusin e hetimeve, pasi dyshohet se mund të kenë lidhje me nipin e pronarit, i cili ndodhet i arrestuar.

Sipas televizionit grek MEGA, hetuesja e çështjes po shqyrton edhe dy persona të tjerë, për të përcaktuar nëse ata kanë pasur dijeni për planifikimin e krimit apo kanë ndihmuar në organizimin e tij. Burimet mediatike flasin për mundësinë që në ditët e ardhshme të lëshohen urdhra të rinj arresti.

Për momentin, përveç nipit të viktimës dhe një biznesmeni nga Athina – të arrestuar si pjesë e dosjes – një urdhër arresti ekziston edhe për një 30-vjeçar tjetër, ortak biznesi i të arrestuarit 31-vjeçar. Ky person dyshohet se ka luajtur rolin e bashkëpunëtorit, duke dhënë udhëzime për dy ekzekutorët 22-vjeçarë përmes numrave telefonikë pakistanezë, si para ashtu edhe pas kryerjes së vrasjes.

Hetimet po përqendrohen gjithashtu tek roli i tij në transportimin e autorëve, pasi skuteri i bardhë i përdorur gjatë krimit besohet se është marrë në një rrugë pranë banesës së tij. Autoritetet mendojnë se ai është larguar jashtë Greqisë, me shumë gjasa drejt Gjermanisë, dhe pritet të lëshohet urdhër arresti ndërkombëtar.

“Një plan i errët që ka nisur shumë më herët”

Mbesa e pronarit të kampingut, Amalia Tomara, ka hedhur dritë mbi prapaskenat e mundshme të krimit. Duke folur për televizionin Alpha, ajo deklaroi se plani kriminal nuk ishte hartuar në muajt e fundit, por qysh në gusht të vitit 2024, kur ishte nënshkruar një dokument që lidhej me pronën e familjes.

Ajo u shpreh se sjellja e kushëririt të saj 33-vjeçar – tashmë i arrestuar – pas ngjarjes ishte tejet arrogante dhe e pazakontë, gjë që i ngjalli dyshime serioze për përfshirjen e tij. Sipas saj, në një moment të caktuar, ai u soll “sikur kishte pushtuar botën”, çka e bindi edhe më shumë se mund të ishte pjesë e organizimit të vrasjes.

Amalia shtoi se xhaxhai i saj – viktima 68-vjeçare – i kishte kërkuar dy herë biznesmenit 31-vjeçar të mos i afrohej më, duke e bërë të paqartë lidhjen e fortë që po krijohej mes tyre.

Lidhur me nënën e të dyshuarit 33-vjeçar, mbesa e viktimës deklaroi se ajo i kishte ndaluar prej vitesh hyrjen në kamping familjar dhe kërkonte që çështja të mos bëhej publike. Ajo pretendon se gruaja ka tentuar të manipulojë situatën juridike të djalit të saj, me qëllim përjashtimin e familjarëve të tjerë nga trashëgimia dhe izolimin e viktimës.

Hetimet vazhdojnë intensivisht, ndërsa autoritetet greke po përpiqen të rindërtojnë plotësisht zinxhirin e ngjarjeve dhe të identifikojnë të gjithë personat që mund të kenë luajtur rol në vrasjen e dyfishtë, e cila ka tronditur opinionin publik në Greqi.