Një ngjarje tragjike ka tronditur Greqinë më 5 tetor, ku u vra një pronar grek dhe punonjësi i tij shqiptar në Finikounda. Pas ngjarjes, dy të rinj 22-vjeçarë janë arrestuar, por njëra nga dëshmitë e tyre është rrëzuar për shkak të pamjeve filmike që kanë zbuluar të vërtetën.
Një prej të dyshuarve, një 22-vjeçar greko-britanik, kishte pretenduar se ishte arratisur duke notuar deri në Kalamata, duke thënë se ishte një notues i shkëlqyer dhe kishte shërbyer në Forcat Speciale. Por pamjet e kapura nga kamerat e sigurisë e tregojnë atë duke ecur përmes stacionit të autobusëve në Kalamata më 6 tetor, një ditë pas vrasjes, i veshur me rroba të ndryshme nga ato të natës së krimit. Kjo provë ka çuar në rrëzimin e alibisë së tij.
Hetuesit kanë kaluar 16 orë në intervista dhe marrje në pyetje, ku të dy 22-vjeçarët, duke përfshirë edhe atë që dyshohet si qitësi, kanë dhënë versione të ndryshme të ngjarjes. Ata janë akuzuar për vrasjen e dy viktimave, por secili ka fajësuar tjetrin për veprime të caktuara në vendin e krimit.
Avokati i të dyshuarit greko-britanik ka insistuar se klienti i tij nuk është autori i vrasjes dhe ka kontestuar identifikimin e tij nga dëshmitari okular. Ai ka theksuar se dëshmia e këtij dëshmitari është plot me pasaktësi dhe se 22-vjeçari ishte jashtë vendit të ngjarjes në momentin e krimit. Sipas avokatit, klienti i tij ka qenë në Finikounda vetëm për të ndihmuar në një akt zhvatjeje dhe se nuk kishte asnjë lidhje me viktimat.
Ky rast është ende në hetim dhe duket se të dy të rinjtë do të përballen me akuza të rënda për vrasje dhe përpjekje për të manipuluar provat.