Prokuroria e Tiranës ka kërkuar dënimin me 25 vite burg për Tomorr Çelën, ish-efektivin e policisë, i cili akuzohet për vrasjen e dy personave, Elton Danit dhe Ledian Hoxhës, në vitin 1997. Çela, i cili ishte në arrati për shumë vite, u ekstradua nga Shtetet e Bashkuara të Amerikës në vitin 2022 dhe është përballur tashmë me akuzat e rënda në lidhje me këtë ngjarje tragjike.
Ngjarja ka ndodhur më 27 nëntor të vitit 1997, në rrugën “Bajram Curri” në Tiranë, pas një përplasjeje të makinave. Sipas hetimeve, tri-katër ditë para ngjarjes, Çela kishte qenë duke udhëtuar me automjetin e tij “Benz Mercedes 240” dhe ishte përplasur me automjetin që drejtohej nga Ledian Hoxha, i cili ndodhej me shokun e tij, Elton Danin. Ky incident përplasi në një konflikt që kulmoi me vrasjen e dy personave.
Pas ngjarjes, Tomorr Çela u zhduk dhe u shpall në kërkim, por më pas u lokalizua dhe u ekstradua në Shqipëri. Hetimet kanë zbardhur se vrasja e dyfishtë ishte pasojë e një konflikti të ndezur nga përplasja, dhe Çela akuzohet për vrasjen e dy personave, që ndodhi pas një përpjekjeje për të zgjidhur problemin në mënyrë dhune.
Aktualisht, prokuroria ka kërkuar dënimin e tij me 25 vite burg, dhe çështja është në procedurë gjyqësore.
NJOFTIMI I PROKURORISË SË TIRANËS
Prokuroria pranë Gjykatës së Shkallës së Parë të Juridiksionit të Përgjithshëm Tiranë, kërkon dënimin me 25 vite burg të shtetasit T.Ç. për veprën penale ‘Vrasje me paramendim’ kryer në bashkëpunim, parashikuar nga neni 78 e 25 i Kodit Penal.
Nga hetimet mbi procedimin penal nr. 2103 të vitit 1997, rezultoi se i pandehuri T.Ç., ka punuar si punonjës policie në Komisariatin e Policisë Nr.4 Tiranë, detyrë nga e cila është liruar më datë 15.06.1997. Gjatë kohës që ka qenë në detyrë ai ka qenë i paisur me armën automatik model Kallashnikov të cilin nuk e ka dorëzuar por e ka mbajtur në banesë pa leje të organeve kompetente.
Ky shtetas, më datë 27.11.1997 rreth orës 20:30 në lagjen nr.9, rruga B.Curri ka qëlluar me armë zjarri automatike ndaj viktimave shtetasve L. H. e E.D. duke ju shkaktuar vdekjen e menjëhershme.
Viktimat në momentin e vrasjes kanë qenë duke udhëtuar me një mjet tip autoveture Volvo. Pas kryerjes së vrasjes i pandehuri T.Ç. është larguar menjëherë nga vendi i ngjarjes.
Gjatë hetimit të këtij procedimi penal nuk është përcaktuar qartë shkaku i ndodhjes së kësaj ngjarje të rëndë me pasojë vrasjen e shtetasve E. D. dhe L.H. Nga sa doli gjatë gjykimit, rezulton se i pandehuri T. Ç. tre katër ditë përpara ngjarjes, duke drejtuar një mjet tip benz Mercedes 240 është përplasur me autoveturën ku udhëtonin shtetasit L.H. dhe E. D., ku për pasojë janë dëmtuar të dy mjetet. Pas aksidentit i pandehuri është konfliktar me shtetasit E. D. dhe L. H. dhe më pas duke mos u dakordësuar në lidhje me dëmet e shkaktuara kanë lindur kontradikta të cilat kanë çuar në ndodhjen e kësaj ngjarjeje të rëndë me pasojë vrasjen e shtetasve L. H. dhe E. D.
Nga aktet e administruara në dosje rezulton se i pandehuri i është shmangur hetimit dhe gjykimit të çështjes në ngarkim të tij. Nga ana e të pandehurit nuk është paraqitur asnjë shenjë pendese për cfarë ai ka kyrer, vrasjen e dy shtetasve të cilët kanë qenë në moshë të re.
Duke patur parasysh rrethanat e çështjes dhe sanksionin që parashikon ligji për këtë vepër penale, Prokuroria pranë Gjykatës së Shkallës së Parë e Juridiksionit të Përgjithshëm, Tiranë kërkon deklarimin fajtor të të pandehurit, T.Ç. për veprën penale ‘Vrasje me paramendim’ në dëm të shtetasit E.D. dhe L.H. dhe dënimin e tij me 25 vite burg.