Një 38-vjeçar është vënë në pranga nga Policia e Durrësit pasi dyshohet se shkaktoi zjarrin që shkrumboi një magazinë fishekzjarrësh ditën e djeshme në Shkozet.
Raportohet se 38-vjeçari ndezi zjarr për djegien e barishteve, por flakët dolën jashtë kontrollit dhe përfshinë magazinën e një subjekti privat. Sipas policisë, specialistët për Hetimin e Krimeve në Komisariatin e Policisë Durrës arrestuan shtetasin me inicialet A. N., banues në Durrës.
Nga veprimet hetimore ka rezultuar se ngjarja ka ndodhur në lagjen nr. 14 të qytetit, ku 38-vjeçari kishte ndezur zjarr pranë magazinës me qëllim djegien e disa barishteve. Për shkak të përhapjes së pakontrolluar të flakëve, zjarri ka përfshirë magazinën, duke shkaktuar dëme të konsiderueshme materiale. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, e cila do të vijojë hetimet për zbardhjen e plotë të rrethanave të ngjarjes.