Komisioni Qendror i Zgjedhjeve (KQZ) vendosi të premten që votat e mbërritura nga Greqia, të cilat ishin lënë pezull pas një kërkese nga Partia Demokratike (PD), të numërohen. Kryekomisioneri Ilirjan Celibashi bëri të ditur se pas verifikimeve të kryera nuk është konstatuar asnjë parregullsi në këto kuti votimi.
Procesi i numërimit ka nisur mëngjesin e kësaj të shtune në ambientet e Parkut Olimpik në Tiranë, nën masa të shtuara sigurie dhe me praninë e përfaqësuesve të forcave politike.
Më herët, PD kërkoi pezullimin e numërimit të votave të ardhura nga Greqia, duke pretenduar për parregullsi në procedurë. Pas vendimit të KQZ për të vijuar me numërimin, Partia Socialiste (PS) e ankimoi çështjen në Komisionin e Ankesave dhe Sanksioneve (KAS), i cili vendosi në favor të PS-së, duke i dhënë dritën jeshile numërimit.
Ndërkohë, PD ka reaguar sërish duke kallëzuar KQZ-në në përpjekje për të ndalur procesin e numërimit, duke e konsideruar vendimin si të paligjshëm dhe në kundërshtim me standardet zgjedhore.
Procesi i numërimit pritet të zgjasë disa ditë, ndërsa vëmendja mbetet e përqendruar në rezultatin e votave nga emigrantët, të cilat mund të kenë ndikim në ndarjen përfundimtare të mandateve.