Një zjarr i rënë pasditen e së premtes në zonën malore të Trullit, në fshatin Surroj të Bashkisë Kukës, u vu nën kontroll falë ndërhyrjes së shpejtë të zjarrfikësve dhe ndihmës së banorëve të zonës.
Flakët përfshinë një sipërfaqe me shkurre dhe bimësi të ulët, ndërsa era e fortë dhe temperaturat e larta favorizuan përhapjen e tyre në terrenin malor.
Menjëherë pas njoftimit, në vendngjarje mbërritën forcat e Shërbimit Zjarrfikës të Bashkisë Kukës, të cilat nisën operacionin për izolimin dhe shuarjen e vatrës së zjarrit, pavarësisht vështirësive të terrenit.
Në aksion u angazhuan edhe banorë të fshatit Surroj, të cilët kontribuuan me mjete rrethanore për të ndaluar përhapjen e flakëve drejt sipërfaqeve të tjera.
Si rezultat i ndërhyrjes së koordinuar, zjarri u neutralizua dhe u shua plotësisht, duke parandaluar dëme më të mëdha në mjedis dhe eliminimin e rrezikut për zonat përreth.
Autoritetet u bëjnë thirrje qytetarëve të tregojnë kujdes maksimal gjatë kësaj periudhe me temperatura të larta dhe të shmangin çdo veprim që mund të shkaktojë zjarre në pyje, kullota apo zona të mbuluara me bimësi.