Qendra e Bashkëpunimit Ndërfetar në Elbasan ka bërë një deklaratë publike lidhur me situatën kritike të krijuar nga zjarri në landfillin e këtij qyteti.
Në deklaratë shprehet shqetësimi i thellë për gjendjen e ndotjes së ajrit në qytet teksa vihet theksi te fakti se situata është përkeqësuar ndjeshëm për shkak të mosfunksionimit të inceneratorit dhe zjarreve të përsëritura në landfillin e mbeturinave.
Qendra e Bashkëpunimit Ndërfetar thotë se ndotja përbën një kërcënim serioz për shëndetin e banorëve dhe mjedisin përreth, ndërsa vihet në dukje mungesa e zgjidhjeve afatgjata për këtë problem që përsëritet çdo vit. Gjithashtu në deklaratë i bëhet thirrje qeverisë që të ndërmarrë me urgjencë ndërtimin e një inceneratori të ri, që të përmbushë standardet bashkëkohore dhe të garantojë mbrojtjen e shëndetit publik dhe mjedisit.
Gjithashtu me anë të deklaratës kërkohet nga organet e drejtësisë të hetojnë me prioritet abuzimet me fondet dhe menaxhimin e inceneratorit ekzistues, si dhe të nxirren para drejtësisë personat përgjegjës për keqadministrimin e kësaj çështjeje.
Deklarata e plotë e Qendrës së Bashkëpunimit Ndërfetar:
Qendra e Bashkëpunimit Ndërfetar kërkon zgjidhje të përhershme për situatën e inceneratorit në Elbasan. Qendra e Bashkëpunimit Ndërfetar shpreh shqetësimin e thellë për situatën alarmante të ndotjes së ajrit në qytetin e Elbasanit, si pasojë e mosfunksionimit të inceneratorit ekzistues dhe shpërthimeve të përsëritura të zjarreve në landfill.
Kjo situatë përbën një rrezik serioz për shëndetin e qytetarëve dhe një kërcënim të vazhdueshëm për mjedisin dhe të ardhmen e brezave të rinj. Në këtë kuadër:
1. I bëjmë thirrje Qeverisë së Shqipërisë të ndërmarrë me urgjencë investimin për ndërtimin e një inceneratori të ri, sipas standardeve bashkëkohore, që garanton mbrojtjen e mjedisit dhe shëndetit publik.
2. U bëjmë thirrje organeve të drejtësisë të hetojnë me përparësi dhe të çojnë përpara drejtësisë të gjithë ata individë apo struktura që kanë abuzuar me fondet dhe menaxhimin e inceneratorit të mëparshëm, tashmë jashtë funksionit.
3. Kërkojmë nga institucionet vendore dhe kombëtare të bashkëpunojnë ngushtësisht për të ofruar një zgjidhje të qëndrueshme dhe afatgjatë për këtë problem që përsëritet çdo vit.
Ne falënderojmë institucionet përgjegjëse, lokale dhe qendrore, për përpjekjet e deritanishme në shuarjen e zjarreve dhe stabilizimin e situatës.
Qendra jonë beson se një mjedis i pastër, i krijuar nga Zoti, është një e drejtë themelore për çdo qytetar dhe një detyrim moral për çdo shoqëri që synon zhvillim të qëndrueshëm, drejtësi dhe mirëqenie për të gjithë.
