Këngëtari legjendar xhamajkan, Jimmy Cliff, ka ndërruar jetë në moshën 81-vjeçare. Lajmin e trishtë për fansat e ka dhënë bashkëshortja e tij, Latifa Chambers, nëpërmjet një postimi në “Facebook” të hënën.
Cliff, së bashku me Bob Marley popullarizuan muzikën reggae, ska dhe rocksteady gjatë një karriere gjashtëdekadëshe.
Ndërkohë sipas gruas së tij, shkaku i vdekjes ishte një krizë e ndjekur nga pneumonia.
I lindur si James Chambers më 30 korrik 1944 gjatë një uragani në St. James Parish, në Xhamajkën veriperëndimore, ai u zhvendos në vitet 1950 nga ferma familjare në kryeqytetin e vendit, Kingston, me të atin, i vendosur për të pasur sukses në industrinë e muzikës.
Në moshën vetëm 14 vjeç ai u bë i famshëm në nivel kombëtar për këngën “Hurricane Hattie”, të cilën e shkroi vetë.
Cliff do të vazhdonte të regjistronte mbi 30 albume dhe të performonte në të gjithë botën, duke përfshirë Parisin, Brazilin dhe në Panairin Botëror, një ekspozitë ndërkombëtare e mbajtur në Nju Jork në vitin 1964. Vitin pasardhës, Chris Blackwell i Island Records, producenti që lançoi Bob Marley dhe Wailers, e ftoi Cliff të punonte në Mbretërinë e Bashkuar me të.
Më vonë, Cliff filloi të merrej me aktrim, duke luajtur në filmin klasik të vitit 1972 “The Harder They Come”, me regji nga Perry Henzell, i cili i prezantoi një audience ndërkombëtare muzikën reggae. Filmi portretizoi aspektet më të ashpra të jetës xhamajkane, duke e ripërcaktuar ishullin si më shumë sesa një shesh lojërash turistike me kokteje, plazhe dhe ujëvara.
