Regjisori i njohur, Vladimir Prifti, ka ndërruar jetë në moshën 81-vjeçare. Lajmi i trishtë është bërë i ditur nga ministrja e Kulturës, Elva Margariti.
Përmes një postimi në rrjetet sociale, Margariti shprehet se kinematografia shqiptare humbi një tjetër emër të madh.
Valdimir Prifti është regjisor i disa prej filmave si “Udha e shkronjave”, “Kush vdes në këmbë”, “Flutura në kabinën time”.
“Sot kinematografia shqiptare humbi një tjetër emër të madh! Regjisori i filmave të paharrueshëm “Udha e shkronjave”, “Kush vdes në këmbë”, “Flutura në kabinën time” e shumë të tjerëve, Vladimir Prifti iu shtua tempullit të përjetësisë! Regjisor i analizës psikologjike, i gdhendjes së karaktereve, që iu largua klisheve të kohës, Prifti ka lënë pas një shkollë për filmin shqiptar. U prehsh në paqe mjeshtër!”, shkruan ministrja e Kuluturës në “Facebook”.
Vladimir Prifti ka lindur më 1 qershor të vitit 1942 në Tiranë. Ai mbaroi Akademinë e Arteve të bukura në vitin 1964, ndërsa njihet si realizues i shumë filmave artistik shqiptarë:
“Gjenerali i ushtrisë së vdekur” (1976);
“Udha e shkronjave” (1978);
“Kur hidheshin themelet” (1978);
“Era e ngrohtë e thellësive” (1982);
“Kush vdes në këmbë” (1985);
“Dhe vjen një ditë” (1987),
“Flutura në kabinën time” (1988);
“Dasma e Sakos” (1998);
“Të bekuarit” (2000);
“Butrinti” (2002);
“Legjenda e Baltës” (2003);
“Rruga Egnatia” (2005).