Shoqëria civile, në garë për 1.5 mln euro

Projekti

Bashkimi Europian pritet që së shpejti të disbursojë grante me vlerë 1.5 milionë euro, të cilat do të mund të përfitohen nga Organizatat e Shoqërive Civile përmes projekteve, që synojnë ngritjen e kapaciteteve menaxhuese të shoqërisë civile, ku rol të veçantë luan edhe media. Në tryezën e organizuar të enjten në Tiranë “TACSO dhe Media”, drejtori i Zyrës së TACSO-s për Shqipërinë, zoti Genci Pasko, tha se “Media, përveçse mund të informojë publikun për mundësitë që ofrohen për përfitimin e këtyre granteve, mund të bëhet pjesë e granteve përmes projekteve në fusha të ndryshme”. Pasko informoi se për periudhën 2008-2013 fondet në dispozicion për Ballkanin Perëndimor kapin vlerën e 81 milionë eurove. “Takimi është një mundësi unike për OSHC-të shqiptare, për të krijuar një kuadër sa më të qartë për oportunitetet dhe pikëpamjet e politikave të BE-së në Bruksel dhe Tiranë në lidhje me shoqërinë civile. Një komponent mjaft i rëndësishëm i projektit TACSO në nivel rajonal është krijimi i partneriteteve dhe shkëmbimi i përvojave ndërmjet OSHC-ve të vendeve dhe rajonit të IPA-s dhe homologëve nga vendet e BE-së”, deklaroi më tej ai.