Administrata e presidentit amerikan Donald Trump ka vendosur masa të reja për kufizimin e vizave për persona që dyshohet se udhëtojnë drejt Shteteve të Bashkuara me synimin për të lindur atje dhe për t’u siguruar fëmijëve shtetësinë amerikane.
Sekretari amerikan i Shtetit, Marco Rubio, bëri të ditur se masat do të zbatohen ndaj individëve dhe rrjeteve që organizojnë ose lehtësojnë udhëtime të tilla. Në shënjestër mund të jenë edhe persona që ndihmojnë aplikantët gjatë procedurave të vizave, si dhe ofrues shërbimesh që lidhen me organizimin e lindjeve në SHBA.
Departamenti Amerikan i Shtetit e ka prezantuar politikën e re me titullin “Mbrojtja e Shenjtërisë së Shtetësisë Amerikane”. Sipas Rubio-s, disa rrjete kanë krijuar skema për të përfituar financiarisht nga të huajt që udhëtojnë në SHBA për të lindur fëmijët e tyre. Autoritetet amerikane paralajmërojnë gjithashtu për raste të mundshme mashtrimi gjatë aplikimit për viza.
Çështja lidhet drejtpërdrejt me debatin mbi shtetësinë në bazë të lindjes në territorin amerikan. Kushtetuta e SHBA-së parashikon, me disa përjashtime, që personat e lindur në territorin amerikan të fitojnë shtetësinë.
Që prej rikthimit në Shtëpinë e Bardhë në vitin 2025, Trump ka kërkuar ndryshime në këtë parim për kategori të caktuara. Nismat e administratës janë kundërshtuar në gjykata dhe kanë shkaktuar një sërë betejash ligjore mbi mënyrën se si mund të kufizohet shtetësia e fituar nëpërmjet lindjes në SHBA.