Një fluturim i pazakontë i avionit presidencial amerikan, Air Force One, mbi Shtëpinë e Bardhë ka shkaktuar ndërprerje të përkohshme të trafikut ajror në Uashington, duke sjellë vonesa në 202 fluturime.
Avioni kaloi dy herë në lartësi të ulët mbi rezidencën presidenciale, në kuadër të një surprize për fëmijët që merrnin pjesë në festën e Halloweenit të organizuar nga presidenti Donald Trump. Pamjet e fluturimit u publikuan edhe nga vetë Shtëpia e Bardhë në rrjetet sociale, ku u cilësuan si një spektakël për të vegjlit.
Por ajo që ishte menduar si një surprizë festive shkaktoi shqetësime në kryeqytetin amerikan. Administrata Federale e Aviacionit (FAA) u detyrua të mbyllte përkohësisht Aeroportin Kombëtar Reagan, një nga aeroportet kryesore të zonës së Uashingtonit.
Sipas raportimeve, autoritetet lokale, aeroporti dhe banorët u njoftuan vetëm 15 minuta përpara fluturimit, ndërsa kompanitë ajrore morën informacion më pak se një orë para realizimit të tij.
Njoftimi i vonuar shkaktoi reagime edhe nga Këshilli i Qytetit të Distriktit të Kolumbias, i cili kritikoi mungesën e paralajmërimit në kohë. Anëtarët e këshillit thanë se ishin vënë në dijeni në momentin e fundit.
Ndërkohë, disa pasagjerë raportuan se avionët e tyre drejt Uashingtonit u detyruan të ndryshonin itinerarin ose të qëndronin në ajër në pritje të rikthimit të operacioneve normale.