Një aksident i rëndë është regjistruar në Siçili të Italisë, ku një autobus shkolle u përplas me një automjet dhe më pas u përmbys në anë të rrugës.
Në autobus ndodheshin nxënës të shkollës “Santa Gemma-Boscarino-Pirandello”, së bashku me mësuesit dhe asistentët bashkiakë. Si pasojë e aksidentit, mbetën të plagosur 13 persona: tetë fëmijë, dy mësues, dy asistentë dhe shoferi i autobusit. Dy nga nxënësit raportohet se ndodhen në gjendje më të rëndë, por jashtë rrezikut për jetën. Aksidenti ndodhi rreth orës 14:30 përgjatë rrugës që të çon drejt Borgata Costiera.
Në vendngjarje ndërhynë menjëherë zjarrfikësit, policia shtetërore, policia bashkiake dhe disa ambulanca. Të plagosurit u transportuan në spitalin e qytetit për trajtim mjekësor dhe kontrolle të mëtejshme. Autoritetet kanë nisur hetimet për të zbardhur shkaqet dhe rrethanat e aksidentit.