Autoritetet turke kanë ndërmarrë një aksion të gjerë kundër komunitetit LGBT+, ku Gjykata e Izmirit ka urdhëruar arrestimin e 16 personave.
Operacioni është justifikuar nga autoritetet me nevojën për “mbrojtjen e familjes tradicionale” dhe të miturve.
Ministri turk i Drejtësisë, Akin Gürlek, deklaroi se hetimet janë zhvilluar nga prokuroritë e Stambollit, Ankarasë, Izmirit, Aydinit dhe Mersinit. Sipas tij, në kuadër të hetimeve janë përfshirë 162 persona të dyshuar, si dhe nëntë shoqata dhe 13 sipërmarrje.
Qeveria turke argumenton se aksioni synon mbrojtjen e fëmijëve dhe ruajtjen e vlerave familjare. Gjatë fundjavës, autoritetet kishin arrestuar gjithashtu 26 persona në Stamboll dhe 21 të tjerë në Ankara, ndërsa kontrolle janë kryer edhe në ambientet e disa organizatave që mbrojnë të drejtat e komunitetit LGBT+.
Sipas prokurorëve, hetimet lidhen me akuza që përfshijnë prostitucionin dhe cenimin e moralit publik. Autoritetet pretendojnë gjithashtu se të miturit po ekspozohen në mënyrë të papërshtatshme ndaj çështjeve që lidhen me orientimin seksual dhe identitetin gjinor.
Operacioni ka shkaktuar reagime të forta nga organizatat për të drejtat e njeriut. “Shoqata Turke për të Drejtat e Njeriut” e ka cilësuar aksionin si “diskriminim të udhëhequr nga shteti”, duke e akuzuar qeverinë për krijimin e një klime frike dhe goditjen e shoqërisë civile.
Aksioni vjen në një kohë kur Presidenti Recep Tayyip Erdogan po promovon fushatën “Dekada e Familjes dhe Popullsisë”, e cila synon nxitjen e lindjeve dhe përballimin e plakjes së popullsisë.
Homoseksualiteti nuk është vepër penale në Turqi, por komuniteti LGBT+ përballet me diskriminim të konsiderueshëm. Presidenti Erdogan ka bërë vazhdimisht deklarata kundër komunitetit LGBTI+, duke e paraqitur atë si kërcënim ndaj strukturës tradicionale të familjes.