Mijëra qytetarë në Dubai u njoftuan sot pasdite me një alarm urgjent sigurie në telefonat e tyre celularë, duke ngritur shqetësime për një mundësi kërcënimi me raketa.

Mesazhi, i dërguar në anglisht dhe arabisht, paralajmëronte se “për shkak të situatës aktuale, ekziston mundësia e kërcënimeve me raketa” dhe u bënte thirrje banorëve të kërkonin menjëherë strehim në ndërtesën më të afërt të sigurt.

Në njoftim rekomandohej gjithashtu që qytetarët të qëndronin larg dritareve, dyerve dhe hapësirave të hapura, si dhe të prisnin udhëzime të mëtejshme nga autoritetet.

Alarmi mbante firmën e Ministrisë së Brendshme të Emirateve të Bashkuara Arabe, gjë që i jep këtij njoftimi një nivel të lartë besueshmërie dhe sugjeron se bëhet fjalë për një masë parandaluese në kuadër të rritjes së gatishmërisë.

Deri tani nuk ka raportime zyrtare për ndonjë incident ose sulm konkret, megjithatë aktivizimi i sistemit të njoftimit masiv tregon se autoritetet e konsiderojnë rrezikun potencial si serioz.