Një incident i dyshuar sabotimi ka vënë në alarm autoritetet gjermane, pas dëmtimit të qëllimshëm të një nënstacioni elektrik në Bergheim, në perëndim të vendit.
Ngjarja është regjistruar rreth orës 21:00. Sipas policisë, hetimet janë përqendruar te mundësia e një ndërhyrjeje të qëllimshme dhe jo te një defekt teknik. Për momentin, nuk ka të dhëna për autorët apo mënyrën se si është dëmtuar infrastruktura.
Pavarësisht incidentit, furnizimi me energji për banorët e zonës nuk është ndërprerë dhe stabiliteti i përgjithshëm i rrjetit nuk është prekur. Operatori i transmetimit Amprion vlerëson se dëmtimi ka shumë gjasa të jetë shkaktuar nga një ndërhyrje e jashtme.
Megjithatë, pas ngjarjes, kompania energjetike RWE u detyrua të shkëpuste përkohësisht nga rrjeti termocentralet me linjit në Neurath dhe Niederaussem, me një kapacitet të kombinuar prej rreth 4,200 megavatësh. Sipas kompanisë, impiantet pritet të rikthehen gradualisht në funksion gjatë ditëve në vijim.
Një tjetër incident i dyshimtë është raportuar në të njëjtën ditë në Brandenburg, në lindje të Gjermanisë, ku linjat e energjisë elektrike janë dëmtuar nga mjete që transportonin materiale përçuese.
Ngjarjet kanë rritur shqetësimet për sigurinë e infrastrukturës kritike në Gjermani. Autoritetet po hetojnë nëse dy incidentet kanë lidhje me njëri-tjetrin dhe nëse bëhet fjalë për pjesë të një serie të koordinuar aktesh sabotimi.