Dhuna seksuale po kthehet në një fenomen në Mbretërinë e Bashkuar, pasi më shumë se 8,500 vepra seksuale ndaj fëmijëve nën moshën 13 vjeç janë regjistruar në Angli dhe Uells gjatë periudhës 2021–2025. Të dhënat tregojnë se janë regjistruar rreth 4.7 raste në ditë. Në të njëjtën periudhë janë raportuar rreth 2,000 raste përdhunimi ose tentative përdhunimi, ndërsa më shumë se një e treta e viktimave në këto raste ishin nën 13 vjeç.
Në të paktën 1,890 raste, i dyshuari është regjistruar si i mitur nën moshën 18 vjeç. Vajzat përbënin shumicën e viktimave në rastet ku gjinia ishte e regjistruar. Të dhënat përfshijnë gjithashtu më shumë se 6,100 incidente që lidhen me posedimin, shkarkimin, krijimin ose shpërndarjen e imazheve të paligjshme të fëmijëve nën moshën 18 vjeç.
Komisionerja për Fëmijët në Angli, Dame Rachel de Souza, e ka përshkruar abuzimin seksual mes fëmijëve si një fenomen të përhapur dhe shpesh të fshehur. Ajo ka theksuar se, pavarësisht masave të marra vitet e fundit, nevojiten përpjekje të mëtejshme për mbrojtjen e fëmijëve.
Qeveria britanike i ka cilësuar shifrat si “të neveritshme” dhe ka theksuar se shkollat kanë detyrim të reagojnë ndaj rasteve të dhunës seksuale dhe ngacmimeve. Autoritetet thonë gjithashtu se po forcojnë edukimin mbi marrëdhëniet e shëndetshme dhe pëlqimin si dhe mbrojtjen e të miturve në internet.