Planeti po shkon drejt tejkalimit të një prej objektivave më të rëndësishëm klimatikë, ndërsa emetimet e gazeve serrë vazhdojnë të arrijnë nivele rekord. Paralajmërimi vjen nga raporti më i fundit i Treguesve të Ndryshimeve Klimatike Globale (IGCC), i hartuar nga mbi 70 shkencëtarë nga 17 vende.
Sipas studimit, temperatura globale e shkaktuar nga aktiviteti njerëzor ka arritur në 1.37 gradë Celsius mbi nivelet para-industriale, duke e afruar botën me pragun prej 1.5 gradësh të përcaktuar në Marrëveshjen e Parisit. Nëse ritmi aktual i ndotjes vazhdon, ky kufi mund të tejkalohet brenda fundit të dekadës.
Raporti ngre shqetësime edhe për zvogëlimin e shpejtë të “buxhetit të karbonit”, sasisë së emetimeve që planeti mund të përballojë pa kaluar pragun kritik të ngrohjes. Sipas ekspertëve, me nivelet aktuale të ndotjes, kjo rezervë mund të konsumohet në vetëm tre vjet.
Gjatë vitit 2024, emetimet globale të gazeve serrë arritën në 56.8 miliardë tonë ekuivalent CO2, niveli më i lartë i regjistruar ndonjëherë. Ndërkohë, përqendrimi i dioksidit të karbonit në atmosferë ka prekur një rekord të ri historik.
Shkencëtarët theksojnë se Toka po grumbullon energji dhe nxehtësi me ritme të papara më parë, çka po përshpejton shkrirjen e akullnajave, ngrohjen e oqeaneve dhe rritjen e nivelit të deteve.
Të dhënat tregojnë se niveli mesatar global i detit ka arritur një rekord të ri në vitin 2025, ndërsa valët e të nxehtit detar janë trefishuar krahasuar me vitet 1990, duke shkaktuar pasoja serioze për ekosistemet detare dhe rezervat e peshkut.
Ekspertët paralajmërojnë se ndikimet e krizës klimatike tashmë po ndihen në të gjitha kontinentet dhe se pa ulje të shpejtë të emetimeve, pasojat do të bëhen gjithnjë e më të rënda në vitet e ardhshme.