Armëpushimi dyjavor mes SHBA dhe Iran është në rrezik pas tensioneve të reja në Lindjen e Mesme. Mediat iraniane raportojnë se Teherani ka vendosur të mbyllë Ngushticën e Hormuzit, në përgjigje të sulmeve izraelite ndaj Libanit, duke paralajmëruar: “Do të shkatërrojmë çdo anije që tenton të kalojë”.
Ndërkohë, marrëveshja për armëpushim parashikon nisjen e negociatave të premten në Pakistan, me ndërmjetësimin e autoriteteve pakistaneze. Lejimi i kalimit të cisternave të naftës nëpër Ngushticën e Hormuzit ishte kushti kryesor për nisjen e bisedimeve, por situata mbetet e tensionuar.
Agjencia iraniane Fars, e lidhur me Garda Revolucionare Islamike, raportoi se ndërsa dy cisterna arritën të kalonin mëngjesin e së mërkurës me leje, kalimi i mëtejshëm është ndalur për shkak të sulmeve izraelite. Edhe Agjencia e Lajmeve e Republikës Islamike konfirmon bllokimin e anijeve, duke i lidhur incidentet me goditjet e Izraelit në Liban.
Situata kërcënon të dëmtojë marrëveshjen, ndërsa Teherani ka dhënë paralajmërime të ashpra ushtarake për shkatërrimin e çdo anijeje që tenton të thyejë bllokadën. Fati i armëpushimit mbetet i lidhur me takimin e së premtes, ndërkohë që rritet shqetësimi për një krizë të mundshme energjetike dhe përshkallëzim të tensioneve ushtarake.