Presidenti i Shteteve të Bashkuara, Donald Trump, deklaroi se operacionet ushtarake amerikane kanë dëmtuar rëndë kapacitetet ushtarake të Iranit, duke theksuar se Teherani ishte ai që nisi përshkallëzimin e konfliktit.
Gjatë një konference për shtyp në Zyrën Ovale, në prani të kryeministrit irakian Ali Al-Zaidi, Trump u shpreh se veprimet e SHBA-së kanë reduktuar ndjeshëm fuqinë ushtarake të Iranit.
“Besoj se ajo që i kemi bërë Iranit është se i kemi hequr pothuajse të gjitha kapacitetet e tij ushtarake”, deklaroi presidenti amerikan.
Trump tha se administrata e tij kishte synuar fillimisht një zgjidhje diplomatike, por sipas tij, Irani ishte ai që ndërmori sulmin e parë.
“Doja t’u jepja një mundësi për të arritur një marrëveshje, por ata sulmuan të parët. Ishte një gabim i madh, sepse ne u kundërpërgjigjëm pa mëshirë,” u shpreh ai.
Presidenti amerikan komentoi gjithashtu vendimin për të hequr dorë nga plani për vendosjen e një tarife prej 20% mbi ngarkesat që kalojnë nëpër Ngushticën e Hormuzit.
Sipas Trump, ai ndryshoi qëndrim pasi u kontaktua nga drejtues të vendeve të Gjirit, të cilët propozuan rritjen e investimeve në ekonominë amerikane si alternativë.
“Ata na thanë se do të preferonin të investonin në Shtetet e Bashkuara me miliarda dollarë, në vend të vendosjes së tarifave,” tha ai.
Në përfundim, Trump theksoi se nuk është mbështetës i tarifave të tranzitit për lundrimin në Ngushticën e Hormuzit, duke shtuar se preferon zgjidhje që nxisin bashkëpunimin ekonomik dhe investimet.