Të premten pasdite, një aeroplan i vogël u përplas në rrokaqiellin më të lartë në Pekin, Kullën CITIC me 109 kate që dominon horizontin e qytetit, duke vrarë pilotin dhe duke plagosur 13 persona të tjerë.

Përplasja bëri që copa xhami dhe mbeturina aeroplani të binin qindra metra poshtë në rrugë, duke shkaktuar panik në zemër të qytetit më të mbrojtur të Kinës.

Pak kohë më vonë, ishte sikur të mos kishte ndodhur asgjë. Të gjitha referencat për incidentin dhe pamjet tronditëse të tij ishin fshirë nga mediat sociale kineze. Qeveria fillimisht nuk e pranoi publikisht se kishte ndodhur ndonjë incident. Mediat shtetërore përfshirë transmetuesin kombëtar të vendit CCTV, me selinë përballë vendit të rrëzimit, nuk e përmendën incidentin, shkruan CNN.

Kjo falë punës së ushtrisë së ‘censorëve’ të Kinës dhe kontrollit obsesiv të autoriteteve mbi informacionin veçanërisht në lidhje me ngjarjet që ata besojnë se mund të sjellin vëmendje ose pasoja negative.
Boshllëku informativ la një mori pyetjesh pa përgjigje për ata që ishin dëshmitarë të ngjarjes ose që panë raportime për të. Për gati një ditë nuk dihej se sa njerëz u plagosën në incident.

Të shtunën pasdite sipas kohës lokale, media e lidhur me qeverinë e Pekinit raportoi se një “aeroplan sportiv i lehtë me një motor dhe dy vende u përplas me një ndërtesë të lartë gjatë fluturimit” dhe se piloti, i vetmi person në bord ishte vrarë dhe 13 persona ishin plagosur në vendngjarje. Incidenti ishte duke u “hetuar”, tha ajo.

Ende nuk dihet nëse përplasja ishte aksidentale apo e qëllimshme.
Ndoshta më shqetësuesja për autoritetet është se kjo ka ngritur gjithashtu pyetje se si piloti arriti të fluturonte mbi kryeqytetin e fortifikuar të Kinës, ku jeton shumica e elitës së Partisë Komuniste dhe ku edhe fluturimi i dronëve është praktikisht i ndaluar.

Aksidenti ndodhi të premten vonë pasdite gjatë orës së pikut. Pamjet e shpërndara në internet në dritaren e shkurtër përpara se censura të vihej në veprim tregonin një aeroplan të vogël që përplasej në katin e sipërm të ndërtesës, i njohur edhe si China Zun.

Imazhet online që tregojnë kodin e regjistrimit të aeroplanit dukeshin se tregonin për një avion sportiv të lehtë të prodhuar në vend, një Sunëard SA 60L Aurora, në pronësi të një kompanie lokale të aviacionit të përgjithshëm, e cila ofron shërbime si trajnim pilotësh, fluturime personale rekreative dhe fotografi ajrore.
CNN pa turma njerëzish që evakuoheshin nga rrokaqielli të mbledhura në rrugët pranë hyrjes, së bashku me kamionë zjarrfikës, makina policie dhe një ambulancë.

Pamjet janë bërë virale në mediat sociale jashtë Kinës kontinentale.
Brenda vendit, një kërkim për “përplasje avioni në Pekin” në Weibo, versioni kinez i X, nuk dha rezultate relevante.

Është praktikë e zakonshme që autoritetet kineze të veprojnë shpejt për të censuruar ose për të imponuar një bllokim informacioni dhe të vendosin një prani të madhe policore për çdo incident që shihet si potencialisht destabilizues i stabilitetit shoqëror.

Të shtunën, rrugët pranë Kullës CITIC u mbyllën dhe policia ishte e pranishme përreth vendit. Vetëm njerëzit që mund të vërtetonin se punonin në zonë u lejuan të hynin. Shoferët e shpërndarjes mbetën të bllokuar jashtë dhe prisnin që punonjësit të dilnin për të marrë porositë e tyre, sipas një gazetari të CNN.

Të dhënat e paverifikuara të fluturimit nga Flightradar24 të postuara në internet duket se tregojnë një rrugëtim të devijuar rëndë të fluturimit të avionit pasi u ngrit nga aeroporti Shifosi i Pekinit.

Fluturimi i çdo avioni të lehtë në Pekin kërkon miratimin si nga Administrata e Aviacionit Civil të Kinës ashtu edhe nga Forcat Ajrore të Ushtrisë Çlirimtare Popullore. Pekini miratoi një rregullore gjithëpërfshirëse muajin e kaluar për të ndaluar në mënyrë efektive fluturimet rekreative të rastësishme dhe dronët e konsumatorëve.

Incidentet vdekjeprurëse dhe shumë publike në Kinë nganjëherë pasohen nga boshllëqe informacioni zyrtar që mund të zgjasin me vite.

Pekini ende nuk ka ofruar ndonjë shpjegim zyrtar për më shumë se katër vjet që kur një avion pasagjerësh Boeing 737-800 i linjës China Eastern u rrëzua në rajonin Guangxi dhe vrau 132 persona, në katastrofën ajrore më vdekjeprurëse të vendit prej dekadash.

Top Channel