Pas plot 738 ditësh robërie në Rripin e Gazës, 20 pengje izraelite u ribashkuan me familjet e tyre në një ditë që u përjetua si simbol shprese dhe fundi tragjedie për shumë familje. Lirimi i tyre u arrit përmes një marrëveshjeje armëpushimi të ndërmjetësuar nga presidenti amerikan Donald Trump, që synon t’i japë fund luftës dyvjeçare mes Izraelit dhe Hamasit.
Pengjet u dorëzuan nga Hamasi tek Kryqi i Kuq, përpara se të transportoheshin në bazën ushtarake Re’im në jug të Izraelit, ku iu nënshtruan vlerësimeve mjekësore. Pamje prekëse treguan përqafime, lot gëzimi dhe emocione të papërshkrueshme në takimet e para me familjarët.
Ndër të liruarit ishin edhe Omri Miran, 48 vjeç, i cili u rrëmbye më 7 tetor 2023 nga shtëpia e tij në Nahal Oz. Ai u fotografua duke përqafuar bashkëshorten e tij Lishay dhe foli për herë të parë me vajzat e tij të vogla, Ronin dhe Almën, të cilat nuk e kishin parë që në fillimet e jetës së tyre.
Në grupin e parë të liruar ishin gjithashtu edhe Matan Angrest (22 vjeç), Alon Ohel (24), vëllezërit binjakë Ziv dhe Gali Berman (28), Eitan Mor (25) dhe Guy Gilboa-Dalal (24). Më pas mbërriti edhe grupi i dytë prej 13 pengjesh, përfshirë Nimrod Cohen, Elkana Bohbot, Rom Braslabski, dhe të tjerë.
Në Izrael, qytetarët u mblodhën në sheshe dhe rrugë për të ndjekur drejtpërdrejt momentet e ribashkimit, ndërsa kanalet televizive raportuan me emocion për zhvillimet.
Në një deklaratë të tij, Trump u shpreh:
“Pas dy vitesh të tmerrshme në errësirë, 20 pengje të guximshme po kthehen në përqafimin e lavdishëm të familjeve të tyre. Lufta ka mbaruar.”
Ndërkohë, 28 trupa të pengjeve të vrarë pritet të kthehen në ditët në vijim, ndërsa ekipet janë ende në kërkim të mbetjeve mortore të disa të zhdukurve.
Presidenti izraelit Isaac Herzog njoftoi se do t’i japë Trump-it Medaljen Presidenciale të Nderit të Izraelit, si shenjë mirënjohjeje për ndërmjetësimin historik.
Atmosfera e gëzimit u përzien me kujtime dhimbjeje dhe betejash të gjata për jetën dhe lirinë. Për shumë familje, ky është fillimi i një kapitulli të ri, ndërsa për të tjerë, pritja dhe dhimbja vazhdojnë.