Ministrat e Mbrojtjes të Bashkimit Evropian janë mbledhur në Irlandë, në një takim ku pritet të dominojnë diskutimet për sigurinë e kontinentit, kërcënimet e reja hibride dhe vazhdimin e mbështetjes ushtarake e financiare për Ukrainën.
Takimi zhvillohet në një periudhë tejet të ndjeshme për Evropën, e cila po përballet me një numër në rritje të incidenteve të dyshuara të sabotazhit dhe aktiviteteve me dronë.
Në fokus është edhe incidenti në aeroportin Leipzig/Halle të Gjermanisë, ku raportohet se një dron i pajisur me eksploziv u gjet pranë një avioni ukrainas që transportonte furnizime ushtarake. Berlini pritet ta lidhë zyrtarisht incidentin me Rusinë.
Ministrja e Jashtme e Suedisë, Maria Malmer Stenergard, e ka cilësuar situatën si sfidën më serioze të sigurisë në Evropë që nga Lufta e Dytë Botërore.
Presioni për sistemet Patriot
Një tjetër çështje që pritet të jetë në qendër të diskutimeve është mbështetja ajrore për Ukrainën.
Kievi po kërkon më shumë interceptorë për sistemet Patriot, me qëllim mbrojtjen e qyteteve dhe infrastrukturës kritike nga sulmet ajrore ruse.
Vëmendja është veçanërisht te Greqia dhe Spanja, vende që disponojnë ende rezerva të konsiderueshme të raketave Patriot dhe mund të përballen me presion nga partnerët evropianë për t’i transferuar ato në Ukrainë.
Edhe financimi i luftës po bëhet problem
Përveç armëve, ministrat evropianë duhet të përballen edhe me një tjetër pyetje të vështirë: si do të financohet Ukraina në muajt dhe vitet e ardhshme. Kredia prej 90 miliardë eurosh e miratuar nga BE-ja tashmë konsiderohet nga disa vende si e pamjaftueshme përballë rritjes së kostove të luftës.
Suedia, Holanda, Spanja dhe Polonia po kërkojnë që Komisioni Evropian të rikthejë në diskutim mundësinë e përdorimit të aseteve shtetërore ruse të ngrira në Evropë për financimin e Ukrainës.
Pjesa më e madhe e këtyre aseteve mbahet në Belgjikë, përmes depozitarit financiar Euroclear. Megjithatë, përdorimi i tyre vazhdon të shoqërohet me paralajmërime për rreziqe të konsiderueshme ligjore dhe financiare.
“Nuk po i japim Ukrainës mbështetje të mjaftueshme”, ka deklaruar ministrja suedeze, duke argumentuar se asetet e ngrira ruse mund të jenë një nga alternativat për të siguruar financimin e nevojshëm.
Kështu, në tryezën e BE-së janë njëkohësisht dronët, sistemet Patriot dhe miliarda eurot për Ukrainën – ndërsa Evropa përballet me një vendim strategjik se sa larg është e gatshme të shkojë në përballjen me kërcënimet ndaj sigurisë së saj dhe në mbështetjen e Kievit.