Garda Revolucionare e Iranit ka deklaruar se ka ndërmarrë një sulm me 12 raketa balistike ndaj Bazës Ajrore Al-Azraq në Jordani, ku ndodhen forca dhe avionë luftarakë amerikanë.
Sipas Teheranit, sulmi ishte pjesë e një operacioni hakmarrës pas goditjeve të fundit amerikane ndaj objektivave iraniane.
Në një deklaratë, IRGC tha se raketat kishin në shënjestër disa objekte brenda bazës, përfshirë hangarë ku strehohen avionë luftarakë dhe një qendër komanduese ushtarake. Autoritetet iraniane pretenduan se objektivat u goditën me sukses, ndërsa paralajmëruan për reagime të tjera në rast të sulmeve të reja amerikane.
Nga ana tjetër, Jordania raportoi se sistemet e saj të mbrojtjes ajrore interceptuan një pjesë të raketave të lëshuara drejt territorit të saj. Nuk ka raportime të konfirmuara për viktima apo dëme të mëdha në bazë.