Ministri i Jashtëm i Danimarkës, Lars Løkke Rasmussen, ka deklaruar se pavarësisht bisedimeve që i cilësoi si “të sinqerta” në Shtëpinë e Bardhë, mosmarrëveshja thelbësore mes palëve për çështjen e Groenlandës mbetet ende e pazgjidhur.
Gjatë një konference të përbashkët për shtyp me ministrin e Jashtëm të Groenlandës, Rasmussen tha se qëllimi i takimeve ishte gjetja e një rruge të përbashkët për garantimin e sigurisë në rajonin e Arktikut. Ai theksoi se është e qartë se presidenti amerikan Donald Trump shfaq interes për marrjen e kontrollit të Groenlandës, por sipas tij, diskutimet kanë ndikuar në një rishikim të qëndrimit amerikan.
“Ne e bëmë shumë të qartë se kjo nuk është në interesin e Groenlandës,” u shpreh Rasmussen, duke shtuar se Danimarka “është padyshim në anën e duhur të historisë”.
Para konferencës, autoritetet daneze njoftuan se do të zgjerojnë praninë ushtarake në Groenlandë, në bashkëpunim të ngushtë me aleatët e tyre. Vendimi vjen në një kohë tensionesh të shtuara gjeopolitike në Arktik.
Nga ana tjetër, presidenti amerikan Donald Trump ka përsëritur se Shtetet e Bashkuara kanë nevojë për Groenlandën për arsye të “sigurisë kombëtare”, duke përmendur kërcënime të mundshme nga Rusia dhe Kina.
Megjithatë, kërkesat e Trump për marrjen e kontrollit mbi ishullin janë refuzuar vazhdimisht nga udhëheqësit e Groenlandës dhe nga Danimarka, e cila është anëtare e NATO-s dhe administron Groenlandën si territor gjysmë-autonom.