Presidenti amerikan Donald Trump deklaroi se Irani ka dhënë sinjale se është i gatshëm të heqë dorë nga zhvillimi i armëve bërthamore, ndërsa negociatat mes Uashingtonit dhe Teheranit për një marrëveshje të re vijojnë ende.
Në një intervistë televizive, Trump tha se bisedimet po vazhdojnë, por theksoi se procesi kërkon kohë dhe se një marrëveshje e qëndrueshme nuk duhet të arrihet me nxitim. Sipas tij, një nga elementët kyç mbetet garantimi i lirisë së lundrimit në Ngushticën e Hormuzit, një korridor strategjik për tregtinë ndërkombëtare të energjisë.
Kreu i Shtëpisë së Bardhë u ndal edhe te situata e sigurisë në rajon, duke deklaruar se kapacitetet detare dhe ajrore të Iranit janë dobësuar ndjeshëm, ndërsa forcat tokësore kanë mbetur kryesisht të paprekura.
Ndërkohë, mediat amerikane raportojnë se administrata e SHBA-së ka rishikuar draftin e marrëveshjes së propozuar për Iranin, duke përfshirë kërkesa shtesë dhe kushte më të forta. Sipas burimeve pranë procesit, qëllimi është rritja e presionit diplomatik ndaj Teheranit dhe përshpejtimi i arritjes së një marrëveshjeje.
Zyrtarë amerikanë kanë shprehur gjithashtu pakënaqësi për ritmin e ngadaltë të përgjigjeve nga pala iraniane, megjithatë kontaktet diplomatike mes dy vendeve vazhdojnë dhe negociatat mbeten të hapura.