Pikëpamjet politike të Donald Trump kanë ndryshuar ndjeshëm gjatë dekadave, por ai ka qenë i qëndrueshëm në një gjë, që nga vitet 1980, ai ka besuar se tarifat janë një mjet efektiv për forcimin e ekonomisë amerikane, raportoi “BBC” dje. Republikani tani ka vënë në rrezik presidencën e tij për të qenë i drejtë.

Një ditë më parë, në “Kopshtin e Trëndafilave” të Shtëpisë së Bardhë, i rrethuar nga miq, politikanë konservatorë dhe ministra të qeverisë, Trump njoftoi tarifa të reja të larta për një numër vendesh, aleate, rivalë dhe vende armike.

Në fjalën e tij, Trump kujtoi se ka mbrojtur tarifat për një kohë të gjatë, si dhe faktin se ai kritikoi marrëveshjet e tregtisë së lirë si NAFTA dhe Organizatën Botërore të Tregtisë, shkruajnë mediat britanike. Ai njoftoi se në ditët në vijim masat e tij do të hasin në rezistencë nga “globalistët” dhe “interesat e veçanta”, por ai u bëri thirrje amerikanëve që t’i besojnë instinkteve të tij. “Kurrë mos harroni se çdo parashikim që kanë bërë kundërshtarët tanë për tregtinë gjatë 30 viteve të fundit ka qenë krejtësisht i gabuar”, tha presidenti amerikan.

“Bomba bërthamore”

“Me vendimet e sotme, më në fund do të kemi sukses ta bëjmë Amerikën sërish të madhe – më e madhe se kurrë”, tha ai. Me vendimin e tij ai mori një rrezik të madh, shkruan “BBC”. Ekonomistët e të gjitha shkollave të mendimit paralajmërojnë se tarifat e mëdha – 53 për qind për Kinën, 20 për qind për Bashkimin Evropian dhe Korenë e Jugut dhe 10 për qind si minimum për të gjitha vendet – do të rëndojnë konsumatorët amerikanë, do të rrisin çmimet dhe ndoshta do të shkaktojnë një recesion global.

Ken Roggoff, ish-kryekonomist i Fondit Monetar Ndërkombëtar, pretendon se probabiliteti që SHBA, si ekonomia më e madhe në botë, të hyjë në recesion është rritur në 50 për qind me njoftimin e Trump. “Ai sapo hodhi një bombë bërthamore në sistemin botëror të tregtisë”, tha Roggoff për BBC.

Kina në “festë”

Lëvizja e Trump rrezikon një luftë tregtare me një numër vendesh me të cilat SHBA kishte forcuar më parë aleancën e saj. Uashingtoni, për shembull, i sheh Japoninë dhe Korenë e Jugut si një kundërpeshë ndaj ambicieve ekspansioniste të Kinës. Por të tre vendet, rivalë historikë, kohët e fundit njoftuan se do të punojnë së bashku për t’iu përgjigjur politikave tregtare amerikane.

Nëse Trump ia del mbanë, ai do të riformësojë rrënjësisht rendin ekonomik global që Shtetet e Bashkuara ndërtuan pas Luftës së Dytë Botërore. Një tarifë prej 54% për mallrat kineze që hyjnë në SHBA është sigurisht e madhe dhe pa dyshim do të dëmtojë kompanitë kineze që përpiqen të shesin në atë treg. Kundërmasat e Pekinit do të dëmtojnë gjithashtu kompanitë amerikane që përpiqen të arrijnë tregun masiv kinez. Por, në një mënyrë, këto lëvizje nga Trump janë gjithashtu një dhuratë për presidentin kinez Xi Jinping. Xi po e portretizon vendin e tij si një kampion të tregtisë së lirë, një mbështetës i institucioneve shumëpalëshe dhe po bën krahasime me superfuqinë tjetër të botës.

Përjashtimi i Rusisë

Edhe pse presidenti i SHBA Donald Trump njoftoi tarifat për aleatët dhe konkurrentët e tij në mbarë botën të mërkurën, disa nga vendet më të sanksionuara, Rusia, Bjellorusia, Kuba dhe Koreja e Veriut, shmangën përfshirjen në listën e tij. I pyetur pse Rusia nuk është në listën e tarifave të reja, Sekretari amerikan i Thesarit Scott Bessent u përgjigj në Fox News se SHBA nuk bën tregti me Rusinë dhe Bjellorusinë sepse ato vende janë nën sanksione të rënda. Zëdhënësja e Shtëpisë së Bardhë Karoline Leavitt i tha Axios se Rusia nuk është në listë sepse nuk ka tregti të rëndësishme me vendin dhe Kuba, Bjellorusia dhe Koreja e Veriut janë tashmë nën tarifa të larta. “Trump mund të mbajë kufizime të reja ekonomike ndaj Rusisë si levë në bisedimet e paqes, tha Alexandra Prokopenko”, një bashkëpunëtore në Qendrën Carnegie Russia Eurasia në Berlin dhe një ish-zyrtare në bankën qendrore ruse.