Autoritetet indoneziane kanë nisur kërkime intensive për një aeroplan të vogël me 11 persona në bord, i cili u zhduk nga radarët mbi pjesën lindore të vendit, kanë njoftuar zyrtarët e shpëtimit.
Aeroplani, në pronësi të linjës ajrore Indonesia Air Transport, ishte nisur nga Yogyakarta drejt Makassar, në provincën South Sulawesi, duke transportuar tre pasagjerë dhe tetë anëtarë të ekuipazhit. Kontakti me avionin u humb pak pas orës 13:00 sipas orës lokale.
Kreu i Agjencisë Lokale të Kërkim-Shpëtimit, Muhammad Arif Anwar, bëri me dije se ekipet e emergjencës janë përqendruar në një zonë malore në distriktin Maros, rreth 42 kilometra nga kryeqyteti i provincës, ku është regjistruar vendndodhja e fundit e aeroplanit.
Në operacionin e kërkimit janë angazhuar forcat ajrore, policia dhe vullnetarë, të cilët po kryejnë kontrolle si nga toka ashtu edhe nga ajri. Drejtori i operacioneve të shërbimit të kërkim-shpëtimit në Makassar, Andy Sultan, njoftoi se në zonë janë dërguar një helikopter dhe një dron për të ndihmuar në lokalizimin e avionit.
Autoritetet indoneziane kanë bërë thirrje për qetësi dhe theksojnë se po e ndjekin situatën me prioritet të lartë, ndërsa priten zhvillime të reja lidhur me fatin e aeroplanit dhe personave në bord.