Takimi i zhvilluar në Sallën e Situatave në Shtëpinë e Bardhë është mbyllur pas afro dy orësh diskutimesh intensive, ndërsa administrata amerikane vijon të mbajë në qendër të vëmendjes dosjen iraniane.
Burime pranë presidencës amerikane bëjnë të ditur se presidenti Donald Trump mbetet i hapur ndaj një marrëveshjeje me Teheranin, por vetëm në rast se ajo përputhet me interesat strategjike të Shteteve të Bashkuara dhe nuk cenon kufijtë që ai ka vendosur për negociatat.
Sipas gazetares së CNN që mbulon Shtëpinë e Bardhë, Alayna Treene, një zyrtar i administratës ka konfirmuar se deri më tani nuk është marrë asnjë vendim përfundimtar në lidhje me drejtimin që do të ndjekin bisedimet me Iranin.
I njëjti zyrtar ka përsëritur se Uashingtoni nuk do të lejojë në asnjë rrethanë që Irani të sigurojë armë bërthamore, duke e cilësuar këtë si një vijë të panegociueshme për administratën amerikane.
Megjithatë, burimet theksojnë se Trump ende nuk ka vulosur strategjinë përfundimtare ndaj Teheranit, çka lë të kuptohet se ditët e ardhshme mund të sjellin zhvillime të rëndësishme në raportet mes dy vendeve.