Kremlini kritikoi të martën deklaratat e kancelarit gjerman, Friedrich Merz, lidhur me garancitë e sigurisë për Ukrainën, duke theksuar se një mekanizëm i tillë nuk mund të krijohet pa pjesëmarrjen e Rusisë.
“Krijimi i garancive të sigurisë për Ukrainën pa pjesëmarrjen e Rusisë është i pamundur”, deklaroi zëdhënësi i Kremlinit, Dmitry Peskov, sipas agjencive ruse të lajmeve.
Peskov tha se qëndrimi i Merz tregon se vendet evropiane ndodhen në një “rrugë pa krye” dhe paralajmëroi se, nëse ato vazhdojnë me këtë qasje, do ta përjashtojnë veten nga procesi i zgjidhjes së konfliktit.
“Deklarata të tilla nënkuptojnë se vendet evropiane nuk mund të jenë pjesë e procesit të paqes”, u shpreh ai.
Komentet e Kremlinit erdhën si reagim ndaj deklaratave të Merz gjatë një konference për shtyp të mbajtur të hënën, pas takimit të të ashtuquajturës “Aleanca e Gatshme”, një grup vendesh që mbështesin Ukrainën.
Kancelari gjerman vlerësoi sukseset e fundit ushtarake të Ukrainës, duke thënë se ato krijojnë një mundësi për arritjen e paqes.
“Ukraina dhe partnerët e saj do të vendosin se si do t’i formësojmë garancitë tona të sigurisë, jo Moska”, deklaroi Merz.
“Aleanca e Gatshme” synon krijimin e një force shumëkombëshe, të udhëhequr nga vendet evropiane dhe me mbështetjen e Shteteve të Bashkuara, e cila do të vendosej në Ukrainë pas përfundimit të luftës për të garantuar sigurinë e vendit.
Rusia ka argumentuar vazhdimisht se zgjerimi i NATO-s drejt lindjes përbën një kërcënim për sigurinë e saj dhe e ka përdorur këtë si një nga arsyet për ndërhyrjen ushtarake në Ukrainë. Kremlini ka kundërshtuar vazhdimisht çdo plan për vendosjen e trupave perëndimore në territorin ukrainas.