Hamas deklaroi të mërkurën se është i gatshëm të pranojë një marrëveshje për armëpushim me Izraelin, por kushtëzon çdo marrëveshje me përfundimin përfundimtar të luftës në Rripin e Gazës.
Sipas agjencisë Associated Press, zyrtari i Hamasit, Taher al-Nunu, tha se grupi është “gati dhe serioz për të arritur një marrëveshje” dhe theksoi se janë “të gatshëm të pranojnë çdo iniciativë që qartë çon në fundin e luftës”.
Deklarata vjen vetëm disa orë pas publikimit të një propozimi të ri për armëpushim, i mbështetur nga Shtetet e Bashkuara dhe bërë publik nga Presidenti amerikan Donald Trump. Megjithatë, Hamas nuk e ka pranuar zyrtarisht planin, duke përsëritur se çdo lëvizje varet nga ndërprerja totale e ofensivës izraelite.
Një delegacion i Hamasit pritet të udhëtojë këtë të mërkurë drejt Kajros për bisedime me ndërmjetësit egjiptianë dhe katarezë lidhur me propozimin në fjalë.
Ndërkohë, situata në Gaza mbetet e rënduar, ndërsa përpjekjet ndërkombëtare për të arritur një zgjidhje paqësore po intensifikohen.