Presidenti Donald Trump do të mbajë sot fjalimin e tij të parë drejtuar Kongresit amerikan që nga ardhja e tij për herë të dytë në Shtëpinë e Bardhë. Megjithatë, një numër i ligjvënësve demokratë kanë paralajmëruar se nuk do të marrin pjesë si një shenjë kundërshtimi ndaj presidentit.
Deputetja Becca Balin e shprehu qartë vendimin e saj: “Unë pashë se si Presidenti u betua për të mbështetur dhe mbrojtur kushtetutën. Unë nuk do të ulem dhe do ta shikoj atë të gënjejë popullin amerikan përsëri”. Ajo tha se nuk do të pranonte të ishte dëshmitare e një fjalimi të tij që, sipas saj, do të përmbante gënjeshtra.
Po ashtu, Deputetja Maxine Waters tha se Trump duhet të gjykohet për tradhti për shkak të lidhjeve të tij me Vladimir Putin dhe Kremlinin. “Ai është një qenie njerëzore e pandershme, e mjerueshme. Ai është plot gënjeshtra dhe mashtrime, dhe ai është në linjë me Putinin dhe Rusinë. Në fakt, ai duhet të gjykohet për tradhti,” tha Waters, e cila theksoi se ky nuk ishte fjalimi i parë i Trump që ajo po bojkotonte.
Në këtë fjalim, Trump pritet të diskutojë nevojën për t’u dhënë fund luftërave në Ukrainë dhe Lindjen e Mesme, të vendosë tarifa ndaj importeve të huaja, si dhe të flasë për shkurtimet qeveritare.