Një hetim i pavarur izraelit ka publikuar një raport prej rreth 300 faqesh, ku pretendohet se gjatë sulmeve të 7 tetorit 2023 nga Hamasi dhe grupe të tjera të armatosura palestineze janë kryer akte të dhunës seksuale në mënyrë “sistematike dhe të përhapur”.
Sipas raportit, këto veprime janë përdorur si “armë lufte” me qëllim shkaktimin e vuajtjeve maksimale ndaj viktimave dhe të mbijetuarve.
Dokumenti përfshin dëshmi të mbledhura nga intervista me të mbijetuar, materiale filmike dhe fotografi, si dhe të dhëna nga vendngjarjet.
Hetimi pretendon gjithashtu se dhuna seksuale është regjistruar si gjatë sulmeve fillestare në Izrael, ashtu edhe ndaj disa prej pengjeve të marrë në Gaza.
Raporti përmend raste dëshmish nga të mbijetuar që kanë folur publikisht ose në mënyrë konfidenciale për trajtim të dhunshëm dhe abuzime.
Hamasi ka mohuar vazhdimisht akuzat për përdorim të dhunës seksuale gjatë sulmeve apo në rastet e pengjeve.
Raporti, i cili synon të krijojë një dokumentim historik të ngjarjeve, thekson se provat e mbledhura mund të shërbejnë edhe për procese të ardhshme ligjore ndërkombëtare.
Sulmet e 7 tetorit 2023 u konsideruan si një nga ditët më vdekjeprurëse në historinë e Izraelit dhe shënuan fillimin e një lufte të përgjakshme në Rripin e Gazës, me pasoja të rënda humanitare në të dyja anët.