Presidenti i Francës, Emmanuel Macron, ka zhvilluar bisedime me disa prej liderëve të rajonit për situatën e tensionuar në Liban. Ai bëri të ditur se ka komunikuar me kryeministrin izraelit Benjamin Netanyahu, si dhe me presidentin libanez Joseph Aoun dhe kryeministrin Nawaf Salam.
Sipas Macron, diskutimet janë fokusuar tek përshkallëzimi i konfliktit mes Izraelit dhe Hezbollahut, organizatë e mbështetur nga Irani, që prej ditësh po intensifikon sulmet dhe kundërsulmet përgjatë kufirit mes dy vendeve.
Raportimet e fundit tregojnë se ushtria izraelite ka hyrë në disa fshatra në jug të Libanit, pranë vijës së demarkacionit të njohur si “Blue Line”, kufiri i përcaktuar nga Kombet e Bashkuara mes Libanit dhe Izraelit.
Nga ana tjetër, Hezbollahu ka vijuar sulmet ndaj territorit izraelit, duke lëshuar raketa dhe dronë, të cilat sipas grupit janë reagim ndaj goditjeve amerikano-izraelite ndaj Iranit.
Në një reagim të publikuar në rrjetet sociale, presidenti francez theksoi se është e domosdoshme që Hezbollahu të ndalë menjëherë sulmet ndaj Izraelit dhe të shmangë përhapjen e mëtejshme të konfliktit në rajon.
Macron shtoi se gjatë bisedës me Netanyahun ka kërkuar që Izraeli të respektojë sovranitetin dhe integritetin territorial të Libanit dhe të tregojë përmbajtje, veçanërisht duke shmangur një operacion të mundshëm tokësor.
Presidenti francez theksoi gjithashtu se Franca do të vazhdojë të mbështesë ushtrinë libaneze në përpjekjet për stabilizimin e situatës dhe për reduktimin e ndikimit ushtarak të Hezbollahut. Paralelisht, Parisi po ndërmerr edhe masa për të ndihmuar civilët libanezë që janë detyruar të largohen nga shtëpitë e tyre për shkak të përshkallëzimit të luftimeve.