Një ceremoni e pazakontë ka tërhequr vëmendjen në Moskë, ku dy robotë humanoidë janë “kurorëzuar” në një martesë simbolike.
Eventi u zhvillua në Bibliotekën Pushkin, ku robotët me emrat Robert dhe Matilda zhvilluan një ceremoni të veçantë, shkëmbyen “betimet” dhe u shpallën zyrtarisht “bashkëshortë robotë”.
Në këtë ngjarje mori pjesë edhe një “qen robotik” i quajtur Dogmatic, i cili kishte rolin e sjellësit të unazave të martesës.
Sipas organizatorëve, dy robotët premtuan të ishin “partnerë të besueshëm përmes të gjitha algoritmeve të jetës”, duke mbështetur njëri-tjetrin përmes përditësimeve dhe duke ruajtur një “lidhje të qëndrueshme”.
Ceremonia simbolike vjen në një periudhë kur zhvillimi i robotikës dhe inteligjencës artificiale po sjell eksperimente gjithnjë e më të shumta mbi mënyrën se si njerëzit ndërveprojnë me makinat.
Edhe pse nuk ka vlerë ligjore, ceremonia u konceptua si një mënyrë kreative për të eksploruar të ardhmen e marrëdhënieve mes teknologjisë dhe shoqërisë.