Një burrë ka hyrë me forcë në një shtëpi i armatosur me një pajisje, pak para një shpërthimi që vrau atë dhe ish-partneren e tij. Policia vendase ka njoftuar se vdekja e gruas po trajtohet si vrasje.
Mediat e huaja shkruajnë se, oficerët u thirrën për një “incident të lidhur me familje” në Bristol të Britanisë, në orën 6:17 të mëngjesit të dielën. Rreth orës 6:30 të mëngjesit, policisë iu tha se një burrë besohej se kishte një pajisje shpërthyese në pronë, dhe rreth dy minuta më vonë ndodhi një shpërthim.
Policia identifikoi 35-vjeçaren Jo Shaw dhe ish-partnerin e saj 41-vjeçar, Ryan Kelly, të cilët pësuan lëndime fatale. Ndërkohë tre persona të tjerë, përfshirë një fëmijë, u trajtuan për lëndime të lehta.
“Vdekja e Jo-së është regjistruar zyrtarisht si vrasje bazuar në informacionin që kemi në dijeni deri më tani. Ne nuk po kërkojmë askënd tjetër në lidhje me vdekjen e saj”, ka thënë mbikëqyrësi Matt Ebbs gjatë hetimit.
Policia e Avon dhe Somerset tha se një referim do t’i bëhet Zyrës së Pavarur për Sjelljen e Policisë për shkak të incidenteve të raportuara më parë në lidhje me dhunën në familje.