Katër ambulanca që i përkisnin një shërbimi të komunitetit hebre janë djegur në veri të Londrës.
Policia Metropolitane e kryeqytetit britanik tha se sulmet po trajtohen si një krim urrejtjeje antisemite.
Katër ambulanca u gjetën në flakë pasi Brigada e Zjarrfikësve të Londrës u thirr në Golders Green rreth orës 01:40 pas mesnatës sipas kohës lokale.
Brigada e zjarrfikësve tha se disa cilindra në automjete shpërthyen dhe shkaktuan thyerjen e dritareve në një bllok apartamentesh aty pranë.
Gjashtë automjete zjarrfikëse dhe rreth 40 zjarrfikës u dërguan për të vënë nën kontroll flakët.
Shtëpitë aty pranë u evakuuan si masë paraprake dhe rreth 30 persona u dërguan në një strehë lokale.
Nga incidenti nuk ka pasur të lënduar dhe të gjitha zjarret janë shuar dhe gjithashtu nuk ka pasur arrestime deri më tani.
Kryeministri Keir Starmer i quati sulmet thellësisht tronditëse dhe të tmerrshme.
“Antisemitizmi nuk ka vend në shoqërinë tonë”, shkroi Starmer në një postim në rrjetet sociale.