Një futbollist i ri 17-vjeçar ka humbur jetën pasi pësoi arrest kardiak gjatë një ndeshjeje, në një tragjedi që ka tronditur komunitetin sportiv në Britani. Adoleshenti Adam Ankers po luante për ekipin U-19 të Chairboys Foundation në vitin 2024 kur u ndje keq gjatë pjesës së dytë të ndeshjes. Pak çaste para se të humbiste ndjenjat ai u ankua se ndiente shtrëngim në gjoks.
Në vendngjarje mbërritën shpejt ekipet e emergjencës dhe lojtari u dërgua në spital, por ai ndërroi jetë disa ditë më vonë. Një hetim zyrtar për ngjarjen zbuloi se kishte pasur një mundësi të humbur për t’i dhënë ndihmën bazë që mund të kishte shpëtuar jetën e tij. Sipas raportit të mjekut ligjor, arresti kardiak dhe frymëmarrja e parregullt nuk u identifikuan në kohë nga personat në fushë dhe nga operatori i telefonatës së urgjencës.
Për këtë arsye askush nuk nisi menjëherë masazhin kardiak apo përdorimin e defibrilatorit në minutat kritike përpara mbërritjes së ambulancës. Hetimi zbuloi gjithashtu se i riu vuante nga një sëmundje e trashëguar e zemrës e quajtur kardiomiopatia aritmogjene e ventrikulit të djathtë, e cila nuk ishte diagnostikuar më parë. Në momentin e kolapsit, personat në fushë menduan fillimisht se lojtari kishte pësuar një krizë ose konvulsion.
Një defibrilator u soll në fushë pak minuta pas rënies së tij, por nuk u përdor për shkak të pasigurisë nëse ishte e sigurt ta aplikonin.