Një vajzë 4-vjeçare ka humbur jetën në Palermo të Italisë, teksa ishte shtruar në sputal. Sipas mediave vendase, dyshimet e para të mjekëve lidhen me difterinë, një sëmundje infektive që është jashtëzakonisht e rrallë në Itali, por që në raste të rënda mund të jetë fatale.
Megjithatë, shkaku i vdekjes nuk është konfirmuar ende. Prokuroria e Palermos ka urdhëruar kryerjen e autopsisë për të përcaktuar shkaqet e sakta të vdekjes dhe për të verifikuar procedurat e ndjekura nga strukturat shëndetësore.
Vajza u dërgua të shtunën në mbrëmje në spitalin Cervello, në gjendje jashtëzakonisht të rëndë shëndetësore. Mjekët e intubuan menjëherë, por për shkak të rëndimit të gjendjes së saj klinike, ajo u transferua në njësinë e kujdesit intensiv të Spitalit Pediatrik. Pavarësisht përpjekjeve të stafit mjekësor, fëmija ndërroi jetë gjatë natës.
“Ne bëmë gjithçka që ishte e mundur për ta shpëtuar fëmijën që nga momenti që e morëm. Fatkeqësisht, nuk patëm rezultatin që shpresonim”, deklaroi Domenico Cipolla, drejtori mjekësor i spitalit Civico.
Sipas autoriteteve shëndetësore, analizat e kryera deri tani kanë ngritur dyshimet për difteri, por konfirmimi përfundimtar pritet pas testeve të mëtejshme që do të kryhen nga Instituti Kombëtar Italian i Shëndetit.
Një nga elementet që po hetohet është fakti se 4-vjeçarja nuk ishte e vaksinuar. Sipas informacioneve të bëra publike, prindërit u kishin thënë mjekëve se kishin vendosur të mos vijonin me vaksinimin e vajzës. Dyshohet se vendimi ishte ndikuar nga frika për një lidhje të mundshme mes vaksinave dhe autizmit, pas një rasti autizmi të regjistruar në familje.
Prokuroria po shqyrton rrethanat në të cilat fëmija mbeti i pavaksinuar dhe nëse janë respektuar të gjitha procedurat e parashikuara. Ndërkohë, autopsia dhe analizat mikrobiologjike pritet të përcaktojnë shkakun e saktë të vdekjes.
Difteria është një infeksion akut bakterial i shkaktuar nga Corynebacterium diphtheriae. Disa lloje të këtij bakteri prodhojnë një toksinë të fuqishme, e cila mund të shkaktojë dëmtime të rënda të indeve dhe të prekë organet jetësore. Forma respiratore e sëmundjes prek kryesisht fytin, hundën dhe bajamet dhe mund të shkaktojë temperaturë, dhimbje fyti dhe vështirësi në frymëmarrje. Një nga shenjat karakteristike është krijimi i një membrane gri në fyt.
Në rastet e rënda, sëmundja mund të shkaktojë bllokim të rrugëve të frymëmarrjes. Toksina mund të dëmtojë gjithashtu zemrën dhe sistemin nervor, duke shkaktuar komplikacione serioze. Difteria transmetohet kryesisht përmes kontaktit të ngushtë me një person të infektuar dhe, më rrallë, përmes objekteve të kontaminuara me sekrecione.