Në Kaliforni, autoritetet janë në kërkim të një personi të armatosur që plagosi me armë zjarri dy oficerë policie të Qarkut Los Angeles të cilët ndodheshin në makinën e shërbimit.
Ngjarja, që dukej si një pritë, shkaktoi një reagim të zemëruar të presidentit Donald Trump.
Ajo u bë shkak gjithashtu për një protestë anti-policore jashtë spitalit ku po mjekoheshin oficerët.
“Për protestuesit që bllokojnë hyrjen dhe daljen e dhomës së urgjencës të spitalit duke thirrur ‘Shpresojmë që ata të vdesin’, duke iu referuar 2 sherifëve të zënë në pritë sot në #Compton: Mos bllokoni hyrjet dhe daljet e urgjencës në spital,” shkroi në Twitter shefi i departamentit të policisë. “Jeta e njerëzve është në rrezik kur ambulancat nuk kalojnë dot.”
Policët, një 31-vjeçare dhe një 24-vjeçar iu nënshtruan një operacioni të shtunën mbrëma, tha Sherifi Alex Villanueva në një konferencë për shtyp. Të dy janë diplomuan në akademinë e policisë 14 muaj më parë, tha ai.
Oficerët u qëlluan ndërsa ishin ulur në makinën e tyre patrulluese në një stacion metroje dhe kërkuan ndihmë me radio, tha sherifi.
Sherifi, departamenti i të cilit është kritikuar gjatë trazirave të fundit racore, shprehu zhgënjim ndaj protestës anti-policore dhe u bëri thirrje njerëzve të luteshin për policët e plagosur.
“Kjo më acaron. Më shqetëson në të njëjtën kohë,” tha ai.
Departamenti publikoi në Twitter videon e të shtënave, ku duket një person që hap zjarr ndaj makinës së policisë.
“Njeriu i armatosur hapi zjarr pa paralajmërim ose provokim,” tha departamenti.
Videoja shkaktoi mijëra reagime, përfshirë atë të presidentit Trump, i cili shkruante: “Kafshët që duhen goditur fort!”
Protestuesit u mblodhën jashtë spitalit ku po mjekoheshin policët e plagosur.
Ndërkohë, kërkimi i personit të armatosur vazhdon./ VOA