Elon Musk ka hyrë në histori si personi i parë që arrin një pasuri prej më shumë se 1 trilion dollarësh, pas rritjes së ndjeshme të vlerës së kompanisë së tij hapësinore SpaceX në tregjet financiare amerikane.
Sipas raportimeve, aksionet e SpaceX shënuan një rritje të fortë gjatë sesionit të sotëm tregtar, duke e çuar vlerësimin e kompanisë mbi kufirin e 2 trilionë dollarëve. Musk zotëron rreth 38% të aksioneve të saj, një pjesëmarrje që tashmë vlerësohet afërsisht në 800 miliardë dollarë.
Përveç SpaceX, miliarderi amerikan mban një pjesë të konsiderueshme të aksioneve të kompanisë së automjeteve elektrike Tesla. Pjesa e tij aktuale në gjigantin automobilistik vlerësohet në rreth 165 miliardë dollarë, ndërsa ai disponon edhe të drejtën për të blerë aksione shtesë me një vlerë që kalon 100 miliardë dollarë.
Revista Forbes kishte vlerësuar pasurinë e Musk pranë kufirit të 1 trilion dollarëve edhe përpara rritjes së fundit të aksioneve të SpaceX. Për këtë arsye, mjaftoi vetëm një lëvizje relativisht e vogël në treg për ta shtyrë atë përtej këtij rekordi historik.
Perandoria financiare e Musk nuk kufizohet vetëm te SpaceX dhe Tesla. Ai është gjithashtu aksioner kryesor në kompaninë e teknologjisë së trurit Neuralink, si dhe në Boring Company, e fokusuar në ndërtimin e tuneleve dhe infrastrukturës së transportit. Pasuria e tij përfshin gjithashtu të ardhura të konsiderueshme nga shitjet e mëparshme të aksioneve të Teslës.
Me këtë zhvillim, Musk jo vetëm që ruan pozicionin si njeriu më i pasur në botë, por vendos edhe një rekord të ri të paprecedentë në historinë e pasurisë globale.