Elon Musk raportohet se ka investuar rreth 1 miliard dollarë në Skydance, grupin e ri mediatik të drejtuar nga David Ellison, pas bashkimit prej 111 miliardë dollarësh të Paramount me Warner Bros. Discovery. Marrëveshja bashkon disa prej emrave më të mëdhenj të medias amerikane, përfshirë studiot filmike Paramount dhe Warner Bros., platformën HBO Max, si dhe rrjetet CBS News dhe CNN.
Mediat shkruajnë se investimi i Musk vjen në një kohë kur lidhjet e tij me familjen Ellison po forcohen. David Ellison është djali i Larry Ellison, bashkëthemeluesit miliarder të Oracle dhe një prej mbështetësve të Donald Trump. Larry Ellison kishte investuar më herët 1 miliard dollarë në blerjen e rrjetit social X nga Musk.
Ndërkohë, drejtuesit e Skydance kanë paralajmëruar se bashkimi i kompanive do të shoqërohet me shkurtime të vendeve të punës. Grupi synon të kursejë mbi 6 miliardë dollarë gjatë tre viteve të ardhshme, ndërsa sipas vlerësimeve të zyrtarëve në Los Anxhelos, rreth 4,500 vende pune në industrinë e filmit dhe televizionit mund të humbasin vetëm në këtë zonë.
Marrëveshja është kundërshtuar edhe nga një grup prej 12 shtetesh amerikane, të cilat kanë ngritur shqetësime për ndikimin e bashkimit në konkurrencën e tregut, çmimet dhe shumëllojshmërinë e përmbajtjeve mediatike.