Presidenti i Turqisë, Recep Tayyip Erdogan, ka reaguar ashpër për fjalimet e mbajtura në Asamblenë e OKB-së, duke mos e cituar drejtpërdrejt kryeministrin izraelit, Benjamin Netanyahu, duke thënë se “kriminelët e luftës” i përkasin gjykatave dhe jo skenës së OKB-së.
Ai shtoi gjithashtu se ata që kryejnë gjenocid duhet të mbahen përgjegjës.
“Kriminelët e luftës nuk e kanë vendin në podiumin e OKB-së, por në sallat e gjyqit, ku do të mbahen përgjegjës për krimet që kanë kryer dhe gjakun që kanë derdhur”, tha më tej Erdogan, gjatë ceremonisë së mbylljes së Panairit të 21-të Ndërkombëtar të Tregtisë MUSIAD EXPO dhe Forumit të 29-të Ndërkombëtar të Biznesit në Stamboll.
“Nëse ata që kryejnë gjenocid nuk mbahen përgjegjës para drejtësisë dhe historisë, të njëjtat mizori do të përsëriten”, paralajmëroi ai.
Erdogan përsëriti mbështetjen e Turqisë për palestinezët, duke thënë: “Populli palestinez nuk është vetëm dhe as i braktisur. Motrat dhe vëllezërit tanë në Gaza nuk janë vetëm në luftën e tyre për të drejta dhe drejtësi”.
“Ne do të vazhdojmë, me sa më shumë që të jetë e mundur, të themi të vërtetën dhe të bëhemi zëri i të shtypurve”, shtoi ai.
Erdogan tha gjithashtu se rajoni më i gjerë, me Turqinë në epiqendër, po përjeton një “stuhi të përsosur krizash”, ndërsa sistemi global është në një rrugë pa krye sa i përket “legjitimitetit, përfaqësimit dhe drejtësisë”.
Kujtohet se të enjten e kaluar, ndërsa po fillonte fjalimi i kryeministrit izraelit në OKB, dhjetëra diplomatë lanë sallën e Asamblesë së Përgjithshme.