Guvernatori i Kalifornisë, Gavin Newsom, ka vazhduar kritikat e ashpra ndaj presidentit amerikan Donald Trump, duke e cilësuar si të papërshtatshëm për të udhëhequr.

Në një intervistë për Fox LA, Newsom deklaroi se “Trump nuk është më i njëjti njeri që takova katër vite më parë” dhe se “nuk është në gjendje të drejtojë”. Këto komente janë pjesë e një sërë deklaratash të forta që guvernatori ka bërë kohët e fundit ndaj presidentit republikan.

Ndër të tjera, ai e ka përshkruar Trump si “një rrezik për sistemin demokratik” dhe ka kritikuar politikat e tij, duke paralajmëruar për tendenca drejt një mënyre qeverisjeje më autoritare.

Deklaratat e Newsom kanë sjellë sërish në vëmendje emrin e tij si një kandidat të mundshëm për zgjedhjet presidenciale të vitit 2028, ndërsa ai vazhdon të jetë një nga figurat më të zëshme të Partisë Demokrate në nivel kombëtar.